Entertainment

भरतपुर महानगरले गर्यो दलितसँग प्रेम विवाह गर्नेलाई ५० हजार र मागि विवाह गर्नेलाई १ लाख पुरस्कारको व्यवस्था

भरतपुर महानगरपालिकाले दलितसँग प्रेम विवाह गर्नेलाई ५० हजार र दलितसँग मागि विवाह गर्नेलाई एक लाख रुपैयाँ प्रोत्साहन स्वरुप पुरस्कार प्रदान गर्ने नीति बनाएको छ । जातीय छुवाछुतलाई निरुत्साहित गर्नको लागि यस्तो नीति लिइएको महानगरले जनाएको छ । आज छैटौं नगरसभामा प्रस्तुत गरिएको नीति तथा कार्यक्रममा कानूनले पूर्णरुपमा निषेध गरेको छुवाछुत एवम् बालविवाह मुक्त महानगर बनाउनका लागि संघ र प्रदेश सरकारसँग सहकार्य गरिने पनि उल्लेख छ । ।

साथै महानगरमा रहेका विपन्न, महिला, दलित, आदिवासी जनजाति तथा वञ्चितीमा परेका लक्ष्यित वर्गको आर्थिक सशक्तीकरणका लागि महिला तथा जोखिम समुदायसँग मेयर कार्यक्रम र समन्यायिक विकासमा उपमेयर कार्यक्रमलाई निरन्तरता दिइने जनाइएको छ । त्यसैगरी, सामाजिक समावेशी नीतिअनुरुप दलित, आदिवासी, जनजाति, पिछडावर्गको सशक्तीकरण र उत्थानका कार्यक्रम सञ्चालन गरिने कार्यक्रममा उल्लेख छ ।

महानगरले महिला तथा बालबालिकाउपर हुने सबै प्रकारका हिंसा अन्त्यका लागि सबै वडाहरूमा अभियान सञ्चालन गरिने, हिंसा विरूद्ध शून्य सहनशीलताको नीति अनुरुप प्रत्येक वडामा लैङ्गिक हिंसा व्यवस्थापन समितिको गठन एवं परिचालन गरिने र सबै नगरस्तरमा वडाहरू सम्मिलित एक लैंगिक हिंसा निवारण कोष स्थापना र सञ्चालन गर्ने जनाएको छ । विशेष संरक्षणको आवश्यकता भएका महिला, बालबालिका, ज्येष्ठनागरिक तथा अपाङ्गता भएका व्यक्तिहरुको संरक्षणका लागि लागि संघीय तथा प्रदेश सरकारसँग सहकार्य गर्ने पनि महानगर जनाएको छ । समाज अहिले धेरै नै परिवर्तन भइसकेको छ । जातीय विभेद र छुवाछुत लगायतका सामाजिक विभेदहरु ह्वात्तै घट्ने क्रममा छन् । जसको पछिल्लो उदाहरण इटहरीमा देखिएको छ । जहाँ बाहुनकी छोरी र बिश्वकर्माको छोराबीच मागी विवाह भएको छ ।

इटहरी ५ आदर्श टोल निवासी उमेश सेन्च्युरी विश्वकर्मा र इटहरी ५ जनता वस्ती निवासी मिरा रेग्मीबीच परम्परागत रुपमा विबाह सम्पन्न गरिएको छ । रेग्मी र सेन्च्युरीको परिवारबीचमा सहमति भएपछि परम्परागत रुपमा दुई अन्तरजातीय समूहका युवा–युवतीबीच मागी विवाह सम्पन्न भएको हो । समाज रुपान्तरण गर्न परिवर्तन आफैबाट शुरु गर्नुपर्छ भन्ने उदाहरणलाई व्यवहारिक रुपमा देखाएका छन इटहरीका दुई युवा सामाजिक अभियन्ता रेग्मी र सेन्च्युरीले । रेग्मी र सेन्च्युरीको परिवारबीचमा सहमति भएपछि परम्परागत रुपमा दुई अन्तरजातीय समूहका युवा–युवतीबीच मागी विवाह गरेर समाजलाई चेतनामुलक सन्देश दिएका छन् ।

Related Articles

Back to top button
Close